ᑭᓲᕙ ᑐᓂᖅ ᑕᐃᒻ?

ᐅᐱᕐᖓᔅᓵᖅ - ᑕᒪᑐᒪᓂ ᓯᕿᓐᓂᖃᑦᑕᐸᓪᓕᐊᓕᕐᒥᑎᓪᓗᒍ ᐅᑭᐅᖅᑕᖅᑐᒥ ᓂᓪᓚᓱᓗᐊᖃᑦᑕᕈᓐᓃᖅᑎᓪᓗᒍ ᐊᒻᒪᓗ ᐅᓪᓗᑯᑖᖑᓂᖅᓴᐅᖃᑦᑕᓕᖅᑎᓪᓗᒍ. 1965-ᒥᓂᑦ ᐃᖃᓗᒻᒥᐅᑦ ᓇᓪᓕᐅᓂᖅᓯᐅᖃᑦᑕᖅᓯᒪᕗᑦ ᑐᓂᖅ ᑕᐃᒻᒥ - ᑕᓪᓕᒪᓂᑦ ᐅᓪᓗᓂᑦ ᐱᓐᖑᐊᖃᑦᑕᖅᑐᑎᒃ, ᓂᔾᔭᐅᓯᔭᖃᑦᑕᖅᑐᑎᒃ, ᓵᓚᔅᓴᕐᓂᑭᓴᐅᑎᖃᑦᑕᖅᑐᑎᒃ ᐊᒻᒪᓗ ᓂᕆᕕᔾᔪᐊᖃᑦᑕᖅᑐᑎᒃ. ᑭᓇᑐᐃᓐᓇᐅᒐᓗᐊᕈᕕᑦ ᐊᒥᓱᓂᑦ ᑕᑯᔭᔅᓴᖃᕐᓂᐊᖅᐳᑎᑦ ᓱᔭᔅᓴᖃᕐᓗᑎᓪᓗ ᑐᓂᖅ ᑕᐃᒻᒥ.

ᑐᓂᖅ ᑕᐃᒻ: ᓄᓇᓕᒻᒥᐅᑎᒍᑦ ᐃᓕᖅᑯᓯᑐᖃᐅᔪᖅ

ᑐᓂᖅ ᑕᐃᒻ ᐱᒋᐊᖅᑎᑕᐅᓚᐅᖅᓯᒪᕗᖅ ᑲᑐᔾᔨᖃᑎᒌᑦᑐᑎᒃ ᓄᓇᓕᒻᒥᐅᑦ ᓯᕗᓕᖅᑏᑦ 1964-ᒥ ᐳᓚᕋᖅᑎᓂᑦ ᑎᑭᐊᑎᑦᑎᓇᓱᐊᖅᑐᑎᒃ ᐅᑭᐅᖅᑕᖅᑐᒧᑦ ᐊᒻᒪᓗ ᐃᖃᓗᐃᑦ, ᑕᐃᔅᓱᒪᓂ ᖃᓪᓗᓈᑎᑐᑦ ᕗᕉᕙᓱ ᕙᐃᖑᓚᐅᖅᑐᖅ ᓄᓇᓐᖑᐊᕐᒦᑦᑐᖅ ᓴᖅᑭᔮᖅᑎᑕᐅᒃᑲᓐᓂᖁᓪᓗᒍ. ᑕᒪᓐᓇ ᐃᓱᒪᒋᔭᐅᓚᐅᖅᐳᖅ ᓄᓇᓕᒻᒥᐅᓄᑦ ᓴᖅᑮᒋᐊᒃᑲᓐᓂᖁᓪᓗᒋᑦ ᐃᓕᖅᑯᓯᑐᖃᕐᒥᓐᓂᒃ ᐃᓄᐃᑦ ᖃᓄᐃᓕᐅᕈᓘᔭᖅᑎᑦᑎᓂᒃᑯᑦ ᐊᒻᒪᓗ ᐱᔭᖏᖅᓴᐃᔾᔪᑕᐅᓗᓂ ᐃᖃᓗᐃᑦ ᐅᐸᑦᑕᐅᖃᑦᑕᑲᓐᓂᖁᓪᓗᒍ ᐳᓚᕋᖅᑎᓄᑦ. ᐃᖃᓗᓐᓂ ᓯᕗᓪᓕᖅᐹᖓᓂ ᓇᓪᓕᐅᓂᖅᓯᐅᓚᐅᖅᓯᒪᕗᑦ ᐅᐱᕐᖓᔅᓵᖓᓂ ᒪᐃ 1965-ᒥ, ᐊᑭᖃᖅᑐᒥᓂᐅᓪᓗᓂ ᑲᑎᑦᑐᒋᑦ $700.00. ᑕᐃᒪᓐᖓᓂᑦ ᑐᓂᖅ ᑕᐃᒻ ᓄᓇᓕᒻᒥᐅᓄᑦ ᓇᓪᓕᐅᓂᖅᓯᐅᕈᑕᐅᖃᑦᑕᖅᓯᒪᕗᖅ ᐃᓕᖅᑯᓯᑐᖃᐅᓕᖅᑐᓂᓗ; ᐃᓚᖏᑦ ᐃᖃᓗᒻᒥᐅᑦ ᓂᕆᐅᑦᑎᐊᖅᐸᑦᑐᑎᒃ ᐊᕐᕌᒍᑕᒫᑦ ᑐᓂᖅ ᑕᐃᒻᓇᐅᓛᕐᓂᖓᓂ. ᑕᐃᒪᓐᖓᓂᑦ ᐊᒥᓱᑦ ᐊᓯᔾᔨᖅᓯᒪᓕᕋᓗᐊᖅᑎᓪᓗᒋᑦ ᓇᓪᓕᐅᓂᖅᓯᐅᕐᓇᕐᒥᑦ ᑐᓂᖅ ᑕᐃᒻ ᓱᓕ ᐊᐅᓚᓂᖃᑦᑎᐊᖅᐳᖅ ᓴᓐᖏᔪᒥᑦ 40-ᐅᓗᐊᖅᑐᑦ ᐊᕐᕌᒍᑦ ᓈᓯᒪᓕᖅᑐᑎᒃ.

ᖃᓄᐃᓕᐅᖃᑦᑕᕐᓂᖏᑦ ᑐᓂᖅ ᑕᐃᒻᒥ

ᑐᓂᖅ ᑕᐃᒻ ᓄᓇᓕᒻᒥᐅᓄᑦ ᐱᕕᔅᓴᖃᕈᑕᐅᕗᖅ ᐊᓃᕈᓐᓇᕐᓗᑎᒃ ᑎᒥᒥᒍᑦ ᐊᐅᓚᓇᖅᑐᓕᕆᓗᑎᑦ ᐊᑯᓂ ᐅᑭᐅᑯᑖᖑᓚᐅᖅᑎᓪᓗᒍ. ᑲᑎᑦᑎᑦᑎᔾᔪᑕᐅᒋᕗᖅ ᓄᓇᓕᒻᒥᐅᓄᑦ, ᓴᖅᑮᒃᑲᓐᓂᕈᑕᐅᓪᓗᓂ ᐃᓕᖅᑯᓯᑐᖃᖅᓯᐅᑎᓂᒃ ᐊᒻᒪᓗ ᓇᓪᓕᐅᓂᖅᓯᐅᕈᑕᐅᓗᓂ ᐊᔾᔨᐅᓐᖏᑦᑐᒥᑦ ᐃᓕᖅᑯᓯᑐᖃᖃᖅᑐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐅᐱᒍᓱᑦᑎᐊᖅᑐᑎᒃ ᐃᓕᖅᑯᓯᑐᖃᕐᒥᓂᒃ, ᐃᓄᓐᓄᑦ ᐱᕕᔅᓴᖃᕈᑕᐅᕗᖅ ᓴᖅᑭᔮᖅᑎᑦᑎᔪᓐᓇᕐᓗᑎᒃ ᐊᒻᒪᓗ ᑲᑐᔾᔨᔪᓐᓇᕐᓗᑎᒃ ᐃᓕᖅᑯᓯᑐᖃᕐᒥᓂᒃ ᐊᒻᒪᓗ ᐃᓅᓯᕆᕙᑦᑕᒥᓐᓂᒃ ᐊᒥᓱᓄᑦ ᐳᓚᕋᖅᑎᓄᑦ ᐅᐸᖃᑦᑕᖅᑐᓄᑦ ᑐᓂᖅ ᑕᐃᒻᒧᑦ. ᐃᓕᖅᑯᓯᑐᖃᖅᓯᐅᑏᑦ ᑐᓂᖅ ᑕᐃᒻᒥ ᐊᑐᖅᑕᐅᖃᑦᑕᖅᑐᑦ ᐅᑯᐊᖑᕗᑦ ᓇᑦᑎᓕᐅᑎᓂᖅ ᐊᒻᒪᓗ ᒪᔾᔭᓕᐅᑎᓂᖅ, ᓄᓇᓕᒻᒥᐅᑦ ᓂᕆᕕᔾᔪᐊᖅᑎᑕᐅᓂᖏᑦ, ᐃᓪᓗᕕᒐᓕᐅᑎᓂᖅ, ᕿᒧᔅᓯᓕᐅᑎᓂᖅ, ᐃᖃᓗᓕᐅᑎᓂᖅ ᐊᒻᒪᓗ ᐃᓕᖅᑯᓯᑐᖃᖅᓯᐅᑎᓂᒃ ᓯᓚᒥᑦ ᐃᓪᓘᑉ ᐃᓗᐊᓂᓗ ᐱᓐᖑᐊᖃᑦᑕᕐᓂᖅ.

ᐊᕐᕌᒎᓯᒪᓕᖅᑐᓂᒃ ᐊᒥᓱᕈᒃᑲᓐᓂᖅᓯᒪᔪᒻᒪᕆᐅᕗᑦ ᖃᓄᐃᓕᐅᕈᓘᔭᖃᑦᑕᕐᓂᐅᔪᑦ ᓇᓪᓕᐅᓂᖅᓯᐅᕐᓇᕐᒥ. ᐅᓪᓗᓂᑦ ᐊᒥᓲᓐᖏᑦᑐᓂᒃ ᐱᒋᐊᕈᑎᖃᖅᓯᒪᓪᓗᑎᒃ ᐃᓕᖅᑯᓯᑐᖃᖅᓯᐅᑎᑎᒍᑦ ᖃᓄᐃᓕᐅᕈᓘᔭᕐᓂᐅᔪᓂᑦ ᐊᑐᖅᑕᐅᓕᖅᐳᖅ ᑕᓪᓕᒪᓂᑦ ᐅᓪᓗᓂᑦ ᓇᓪᓕᐅᓂᖅᓯᐅᕐᓇᐃᑦ, ᐊᒥᓱᒻᒪᕆᐅᓪᓗᑎᒃ ᐋᖅᑭᑦᑕᐅᓯᒪᔪᑦ ᖃᓄᐃᓕᐅᕐᓂᐅᓂᐊᖅᑐᑦ ᐊᔾᔨᒌᓐᖏᑦᑑᑏᑦ. ᑕᑯᓐᓇᕈᒪᒐᔭᖅᑕᓯ ᐅᑯᓂᖓ ᐃᓚᖃᖅᑐᑎᒃ ᖃᒧᑕᐅᔭᒃᑯᑦ ᓱᒃᑲᓂᑭᓴᐅᑎᔪᑦ ᖁᒻᒧᐊᒋᐊᒃᑯᑦ, ᖃᒧᑕᐅᔭᐃᑦ ᓱᒃᑲᓂᑭᓴᐅᑎᔪᑦ ᒪᓂᖅᑲᒃᑯᑦ, ᑐᓂᖅ ᑕᐃᒻᒥ ᓵᓚᔅᓴᕐᓂᑭᓴᐅᑎᔪᑦ ᖃᓄᐃᓕᐅᕈᓘᔭᖅᑎᑕᐅᓪᓗᑎᒃ, ᓴᓈᓂᑦ ᓂᐅᕕᕋᖅᑎᑦᑎᔪᑦ, ᕿᓂᖅᑎᑕᐅᖃᑦᑕᖅᑐᑦ ᑭᓱᑐᐃᓐᓇᕐᓂᒃ ᓇᒥᑐᐃᓐᓇᖅ ᐊᒻᒪᓗ ᐊᒥᓱᑦ ᐊᓯᖏᑦ.

ᓇᑭᑦ ᐱᔭᐅᓯᒪᕙ ᑕᐃᔭᐅᓂᖓ ᑐᓂᖅ ᑕᐃᒻ?

ᑐᓂᖅ ᑕᐃᒻ ᐊᑦᑎᖅᑕᐅᓯᒪᕗᖅ “ᑐᓂᕐᒥᑦ” ᐊᑎᕆᔭᒥᐅᓪᓗᓂ ᑐᓂᕐᒧᑦ. ᖃᐅᔨᒪᔭᐅᔪᑦ ᐃᓄᓐᓂᒃ ᖃᐅᔨᓴᖅᑎᓄᑦ ᑐᓂᐅᓂᕋᖅᑕᐅᓪᓗᑎᒃ, ᓄᓇᖃᓚᐅᖅᑐᑦ ᐊᑯᑭᑦᑐᐃᑦ ᓄᓇᖓᓐᓂᑦ ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᑕ ᑲᓇᓐᓇᖓᓂ ᒫᓐᓇᓕᓴᐃᑦ ᐃᓄᐃᑦ ᓯᕗᕚᖏᑦ ᑎᑭᐊᓂᑯᐃᑦ ᐊᓛᔅᑲᒥ 1000 ᐊᕐᕌᒍᐃᑦ ᓈᓕᖅᑐᑦ. ᐃᓄᐃᑦ ᐅᓂᒃᑳᑐᖃᖏᒍᑦ ᐅᖃᖃᑦᑕᖅᓯᒪᕗᑦ ᑐᓃᑦ ᐊᖑᓇᓱᑦᑎᒻᒪᕆᐊᓘᓚᐅᕐᒪᑕ ᐊᒻᒪᓗ ᓴᓐᖏᔪᒻᒪᕆᐊᓘᓪᓗᑎᒃ ᓱᒃᑲᔪᒻᒪᕆᐊᓘᓪᓗᑎᓪᓗ. ᐱᓯᔅᓯᖃᖃᑦᑕᓚᐅᓐᖏᒻᒪᑕ ᐅᓈᕐᓂᓪᓗ ᖃᓂᔅᓴᖅᑐᑎᒃ ᐊᖑᓇᓱᒋᐊᖃᖃᑦᑕᓚᐅᖅᐳᑦ ᑑᕐᓂᒃ ᐊᑐᖅᑐᑎᒃ. ᐅᓂᒃᑳᖑᖃᑦᑕᖅᓯᒪᕗᑦ ᖁᓕᑦᑕᐅᔭᖏᑦ ᑕᑭᔪᐊᓘᕙᓐᓂᕐᒪᑕ ᑐᓃᑦ ᐊᖑᓇᓱᑦᑏᑦ ᑐᐱᖅᑎᑐᑦ ᐊᑐᖅᑕᐅᕙᑦᑐᒥᓂᐅᓪᓗᑎᒃ, ᐃᓗᐊᓂ ᖁᓪᓕᕋᓛᕐᒥᑦ ᐃᑯᒪᑎᑦᑎᓪᓗᑎᒃ ᐅᖅᑰᓇᓱᐊᖅᑐᑎᒃ ᓇᑦᑎᕐᒥᑦ ᓂᑉᐸᖅᑎᓪᓗᒋᑦ. 600 ᐊᕐᕌᒍᐃᑦ ᓈᓕᖅᑐᑦ ᑐᓃᑦ ᐱᑕᖃᕈᓐᓃᓚᐅᖅᐳᑦ ᐊᑯᑭᑦᑐᐃᑦ ᓄᓇᖓᓐᓂᑦ ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᑭᓯᐊᓂ ᐃᖅᑲᐅᒪᔭᐅᖏᓐᓇᕐᓂᐊᖅᐳᑦ ᐃᓄᐃᑦ ᐅᓂᒃᑳᖅᑐᐊᖅᑐᖃᖏᑎᒍᑦ.